بتأسف على الألفاظ وكان نفسي اكمل لوحدي.. أول تعليق من حسن شاكوش بعد حلقته مع رامز جلال

وجه مطرب المهرجانات حسن شاكوش رسالة لجمهوره بعد حلقته في برنامج رامز جاب من الآخر الذي يقدمه الفنان رامز جلال عبر قناة mbc مصر.

حسن شاكوش يوجه رسالة لجمهوره بعد حلقته في رامز جاب من الآخر 

وقال حسن شاكوش خلال لايف عبر حسابه الشخصي بموقع تبادل الصور والفيديوهات القصيرة انستجرام يرصده تحيا مصر : عايز أقول لجمهوري متزعلوش حقكم عليا كنت عايز أقدم ليكم أحسن حاجة وحلقة حلوة عشان إحنا في جو رمضان وعايز الناس تنبسط وقلت الناس تبقى مبسوطة بالحلقة، وقلت أنا عارف أني رايحة لرامز بالرغم أي حاجة هتحصل بس قلت مش مهم المهم الناس تنبسط.

وتابع حسن شاكوش: أنا اسف على اللى أنتم شفتوه في الحلقة عشان كمان الحلقة مكملتش ومحصلش نصيب، أنا كحسن شاكوش كنت عايز أكمل الحلقة لوحدي، لأن رامز نجم كبير ودي يعتبر 3 سنة أطلع مع رامز وهو محترم، وشكرًا لرامز أنه اختارني من ضمن النجوم اللى استضافهم في البرنامج.

وأضاف شاكوش: بقول لرامز متزعلش وحقك عليا أنا عارف أن كنت عايز تقدم أحلى حاجة لجمهورك، بس ده يثبت للوطن العربي كله أنك أنت مش بتتفق مع نجم، وكنا ممكن عادي نكمل الحلقة بس أننا منكملش الحلقة في مصداقية أني مكنتش أعرف واتفاجئت أن في ضيف تاني، والحمدلله على كل حال وكل واحد مش بياخد أكتر من نصيبه، وبتأسف لكل الناس اللى سمعت أي ألفاظ مش كويسة حتى لو مش مني، وإن شاء الله نتقابل رمضان اللي جاي.